অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

किडनीअ जी बनावत ऐं उन जा कम​

किडनी इन्सानी शरीर में तमामु अहिमियत वारो अुज़िवो आहे । हिन जी बनावत ऐं कार्य तमामु पेचीदा आहिनि । इन जा ख़राब कम गंभीर बीमारिअ या मौत पिणु आणे सघनि था । इन जा मुख्य ब कम आहिनि : नुक़िसानकार ऐं ज़हिरी कचिरे खे बाहिर कढणु ऐं शरीर में पाणी , मइदिन शयूं ऐं कीमियाई शयुनि जो अंदाज़ बरिक़रार रखणु ।

किडनीअ जी बनावत​

किडनी शरीर जे ज़हिरी शयुनि खे दूर करे ऐं शरीर मां वधीक पाणी दूर करे ऐं रतु खे साफ़ करे पेशाब ठाहे थी । उन पेशाब खे नेकाल करण जो कमु पेशाब वाहिनी (Ureter) मसानो (Urinary Bladder) ऐं मूत्र नली (Urethra) द्वारां थींदो आहे ।

  • औरत हुजे चाहे मर्द घणो करे सभिनी जे शरीर में ब किडनियूं आयल हूंदियूं आहिनि ।
  • किडनियूं पेट जे मथिअें ऐं पुठिअें हिस्से हिस्से में करंघे जे बिन्ही पासे (पुठीअ जे हिस्से में ), छातीअ जे पासेरियुनि जे पुठियां सलामत नमूने हिक -हिक आयल हूंदी आहे ।
  • किडनीअ जी शिकिल खाजे जहिड़ी आहे । बालिग़ अवस्था में किडनी अटिकल 10 से.मी. डिघी, 6 से.मी. वेकिरी ऐं 4 से.मी. थुलिही हूंदी आहे ऐं उन जो वज़न 150 खां 170 ग्राम हूंदो आहे ।
  • किडनीअ में ठंहदड़ पेशाब मसाने ताईं पहुचाईंदड़ नलीअ खे पेशाब वाहिनी चइबो आहे जेका अटिकल 25 से.मी. डिघी हूंदी आहे ऐं उहा ख़ास क़िसिम जे लिचकेदार मुशकिन जी ठहिरयल हूंदी आहे ।
  • मसानो पेट जे हेठिअें हिस्से में अगिऐं तरफ आयल मुशिकिन जी ठहियल हिक गोथिरी आहे जेका पेशाब गडु करे थी ।
  • जडहिं मसाने में अटिकल 400 मि.लि. लिटर जेतिरो पेशाब गडु थींदो आहे तडहिं पेशाब करण जी इच्छा थींदी आहे ।
  • मूत्र नलीअ महरफत पेशाब शरीर खा बाहिर नेकाल कयो वेंदो आहे । औरतुनि में पेशाब नली नंढी हूंदी आहे ऐं मर्दिन में उहा कुझ वधी डिघी हूंदी आहे ।

किडनी शरीर लाइ ज़रूरी छो आहे ?

  • हरहिक इन्सान द्वारां वरितल ख़ोराक जे क़िसिम ऐं उन जे अदांज़ में हमेशह फेरिफार थींदो रहंदो आहे ।
  • ख़ोराक जी विविधता जे करे शरीर में गडु थींदड़ पाणी, मइदिनी शयूं ऐं जुदा जुदा ऐसेडिक अनासरनि जे अंदाज़ में पिणु फेरफार थींदो रहंदो आहे ।
  • खाधे जे ख़ौरिशी शयुनि जे हज़म थियण ऐं उपयोग दरम्यान केतिरियूं ग़ैर ज़रूरी शयूं शरीर में पैदा थियन थियूं ।
  • शरीर में पाणी, मइदिनी ऐं कीमियाई शयूं ऐं इख़िराजी शयुनि में थींदड़ इजाफ़ो या फेरिपार माण्हूअ लाइ मौतिमार बि थी सघे थो ।
  • किडनी पेशाब ज़रीय गै़र ज़रूरी पाणी ऐं शयुनि खे दूर करे रतु खे साफ़ करणु ऐं शरीर में पाणी , मइदिनी शयूं ऐं ऐसिड ऐं अल्कली ते ज़ाबते रखे थी । रतु में आयल इन्हनि शयुनि जो योग्य अंदाज़ रखी शरीर खे तंदुरस्त रखे थी ।

किडनीअ जा मुख्य कम कहिड़ा-कहिड़ा आहिनि ?

किडनीअ जो शुरुआती कमु पेशाब ठाहिणु ऐं रतु खे साफ़ करणु आहे । किडनी निकमियूं शयूं दूर करे थी, वधीक लूण ऐं कीमियाई शयूं जेके शरीर लाइ घुरिबल (उपयोगी) न आहिनि, उहे दूर करे थी । किडनीअ जा मुख्य कम हेठीअं रिति आहिनि :

  1. बेकार शयुनि जो नेकाल करणु :बेकार शयुनि खे नेकाल करे रतु खे साफ़ करण​, किडनीअ जो तमाम अहिमियत वारो कमु आहे । जेको खाधो असां खाऊं था, उन में प्रोटीन हूंदी आहे । प्रोटीन शरीर जो वाधि ऐं गाठि खे दूर करण लाइ ज़रूरी आहे पर जींअ त प्रोटीन जो शरीर में उपयोग थिऐ थो, इन कर उन में निकमियूं शयूं पैदा थियनि थियूं , इन्हनि बेकार शयुनि जो गडु थियण शरीर लाइ ज़हिर समान आहे । किडनी रतु खे छाणे थी ऐं ज़हिरी बेकार शयुनि जो पेशाब ज़रिये नेकाल करे थी । क्रीअेटीनिन ऐं पेशाब (युरिया) इहे ब बेकार पैदाइशूं आहिनि, उन्हनि जो इन्सानी शरीर में अंदाज सविलाईअ सां मापे सघिजे थो । रतु में उन्हनि जी "कीमत​" किडनीअ जे कम ते असरु कंदी आहे । जडहिं बई किडनियूं फेल थियनि थियूं, तडहिं रतु जी तपास में क्रेअेटीनिन ऐं यूरिया वधी वेंदा आहिनि ।
  2. वधीक पाणीअ जो नेकालु करणु:किडनीअ जो बियो मुख्य कमु आहे शरीर में पाणीअ जो अंदाज़ क़ाइम रखणु । वधीक पाणी पेशाब ज़रिये नेकाल करे ज़रूरी पाणीअ जो अंदाज़ शरीर में क़ाइम रखणु । जड॒हिं किडनी फेल थींदी आहे त उहा वधीक पाणीअ जो अंदाज़​ पेशाब ज़रिये बाहिर कढण जी शक्ति विञाअे विहंदी आहे ऐं शरीर में पाणीअ जो वधीक गडु थियणु सोज आणे थो ।
  3. मइदिनी लूण ऐं कीमियाई शयुनि जो बैलेंस​:किडनी शरीर में सोडियम, पोटेशियम , क्लोराईड, मैगनेशियम , फास्फोरस​, बाय कार्बोनेट वगै़रह जो अंदाज़ कायम रखण जो कमु कंदी आहे । सोडियम जी वधि घटि (घटि-वधाई) मग़ज़ ते ऐं पोटेशियम जि वधि घटि (घटि-वधाई) दिल ऐं मुशकिन जे कमनि ते गंभीर असर करे सघे थी ।
  4. रतु जे दाब ते ज़ाबितो:किडनी केतिरनि हार्मोन्स रेनीन एञीयटेन्सीन , आल्डोस्ट्रोन्, प्रोस्टाग्लेन्डन वगै़रह ऐं शरीर में पाणी ऐं लूणनि जे मुनासिब ज़ाबते ज़रिये रतु जे दाब खे ज़ाबिते में रखण में अहिमियत जो पार्ट अदा करे थी । हार्मोन्स जी ख़ामी ऐं लूण ऐं पाणीअ जी बे बंदोबस्तगी किडनी फेल्यर जे मरीज़नि में ऊचो रतु जो दाबु पैदा करे सघे थी ।
  5. रतु जे गाड़िहनि जुज़नि जे उत्पादन में मदद : रतु जा गाड़िहा जुज़ा हडनि जे पोराण में पैदा थियन था । उन लाइ ज़रूरी अनासर अेरीथ्रोपोअेटीन किडनीअ में ठहंदा आहिनि । किडनी फेल्यर में इहा शै घटि या न ठहण सां , गाड़िहनि जुज़नि जो उत्पादन घटिजी वेंदो आहे ऐं रतु में एनिमिया यानी हिमोग्लोबिन घटि थी वेंदो आहे ।
  6. हडनि खे तंदुरुस्त रखणु : किडनी सक्रिय विटामिन डी ठाहिण में मदद कंदी आहे । इहा विटामिन डी शरीर में कैल्शियम ऐं फास्फोरस जो मुक़रर अंदाज क़ाइम रखी हडनि ऐं डंदनि जे विकास ऐं तंदुरस्तीअ में अहिमियत जो पार्ट अदा करे थी । सक्रिय विटामिन डी जे घटिजण करे , हडनि जी वाधि अटकी वेंदी आहे ऐं उहे कमिज़ोर थी पवंदा आहिनि । बारनि में वाधि में पवंदड़ रंडक किडनी फेल्यर जी पहिरीं निशानी थी सघे थी ।
  • किडनीअ में रतु साफ़ थी पेशाब कहिड़े नमूने ठहंदो आहे ?

    किडनी जहिड़े नमूने ज़रूरत वारियुनि शयुनि खे रखी, वधीक ऐं गै़र ज़रूरी शयुनि जो पेशाब ज़रिये नेकाल कंदी आहे, इहा प्रक्रिया सचुपचु अजब में विझंदड़ ऐं मुंझियल आहे ।

  • छा, तव्हां खे ख़बर आहे त बिन्ही किडनियुनि में हर मिनिट 1200 मि.लि. रतु साफ़ थियणु लाइ ईंदो आहे, जेको दिल मइरिफ़त पहुचंदड़ रतु जो 20 सेकिड़े जेतिरो थींदो आहे ?

    किडनीअ जो मुख्य कमु रतु खे साफ़ करणु ऐं पाणी ऐं लूणनि ते ज़ाबितो रखी पेशाब ठाहिणु ।

  • रतु खे साफ़ करे पेशाब ठाहिण जो कमु कंदड़ किडनीअ जे नंढे में नंढे हिस्से (सुख्यम फिल्टर​) खे नेफ्रोन चइबो आहे ।
  • हरहिक किडनीअ में डह लख जेतिरा नेफ्रोन आयल हूंदा आहिनि । हरहिकु नेफ्रोन ग्लोमेरूलस ऐं ट्यूबयूलस जो ठहियलु हूंदो आहे ।
  • तव्हां खे इहो जाणी अजबु लगंदो त ग्लेमेरूलस तोर सुञाणप में ईंदड़ छाणीअ ज़रिये हर मिनिट में 125 मि.लि. (मिलि लिटर​) पाणी (पाणियठु) छणिजी, 24 कलाकनि में शुरूआती तबक़े में 180 लिटर पेशाब ठहंदो आहे ।
  • इन 180 लिटर पेशाब में ग़ैर ज़रूरी इख़िराजी शयूं मइदिनी लूण ऐं ज़हिरी कीमियाई शयूं हूंदियूं आहिनि पर गडोगड बदन लाइ ज़रूरी अहिड़ा ग्लूकोज़ ऐं बियूं शयूं पिणु हूंदियूं आहिनि । शरीर लाइ ज़रूरी अहिड़ा गाड़िहा जुज़ा, अछा जुज़ा, चरबी ऐं प्रोटीन पेशाब ज़रीये न निकरंदा आहिनि ।

    ग्लोमेरूलस में ठहंदड़ 180 लिटर पेशाब ट्यूबयूलस में ईंदो आहे, जिते उन मां 99 सेकिड़ो पाणी चतुराईअ सां वरी चुसिजी (Reabsorption) वेंदो आहे ऐं बाकी 1% पाणी पेशाब मारफ़त निकरी वेंदो आहे ।

  • बिन्ही किडनियुनि जे टयूब्यूलस जी कुल डेघि 10 किलो मीटर जेतिरी थिऐ थी ।
  • टयूब्यूलस में जुज़िब थियण खे चतुराईअ वारो छो चयो वियो आहे? छाकाणि त 180 लिटर जेतिरे घणे अंदाज़ में ठहंदड़ पेशाब मां सभु ज़रूरी शयूं ऐं पाणी वापसि छिकियो वेंदो आहे । फक़ति 1 खां 2 लिटर पेशाब में समूरो कचिरो ऐं वधीक लूण दूर कया वेंदा आहिनि ।

पेशाब में समूरो कचिरो ऐं वधीक लूण दूर कया वेंदा आहिनि । इन नमूने किडनीअ में तमाम ख़बरदारीअ सां साफ़ थियणु ऐं छणणु ऐं जुज़िब थियण खां पोइ ठहियलु पेशाब​, पेशाब वाहिनीअ ज़रिये मसाने में वेंदो आहे ऐं मुत्र नलीअ ज़रिये शरीर खां बाहिर निकिरंदो आहे । पेशाब जे अंदाज़ में तमाम घटिजणु या वधणु किडनीअ जी तकिलीफ डेखारे थो ।

छा तंदुरस्त किडनीअ वारे माण्हूअ में पेशाब जे अंदाज़ में वधि घटि थी सघंदी आहे ?

  • हा, पेशाब जो अंदाज़ असां केतिरो पाणी पीऊं था ऐं आबहवा जो गरिमी पद केतिरो आहे, उन ते मदार रखे थो ।
  • जेकडहिं को माण्हू घटि पाणी पीअंदो त फक़ति अधि लीटर (500 मि.लि) जेतिरो घटि पर घाटो पेशाब ठहंदो आहे । जेकडहिं को माण्हूं वधीक पाणी पीअंदो त वधीक पर छिड़ो पेशाब पिणु ठही सघे थो । ऊन्हारे में वधीक पघर थियण सां पेशाब जो अंदाज़ घटिबो आहे मगर सियारे में पघर घटिजण सां पेशाब जो अंदाज़ वधंदो आहे । रवाज़ी अंदाज़ में पाणी पीअंदड़ माण्हूअ में जेकडहिं पेशाब 500 मि.लि. (अधि लिटर​) खां घटि या 3000 मि.लि. (टे लिटर ) खां वधीक ठहे त ऊहा किडनीअ जी बिमारीअ जी मुख्य निशानी आहे ।
  • किडनी रतु गा॒ड़िहनि जुज़नि खे ठाहिण ऐं हडनि जी मज़बूतीअ में अहिमियत जो पार्ट अदा करे थी ।

स्रोत : किडनी एजुकेशन

आख़िर बदलाउ कयल : 2/19/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate